भाग बारा

*बाईकसवारी:-एक प्रवास*

🌅🏞🛣दिवस तिसरा🏞🛣🌄

🌿🌿 *भाग तेरा*🌿🌿

             आज एक जीवाचा जिवलग मित्र मिळाल्याचा आनंद ओसंडून वाहत होता त्याच मस्तीत मी गाडीवर बसून मी मुख्य रस्त्यावर आलो होतो एक सांगायचे राहिलेच दापोलीहून येताना 7 किमी अंतरावर आसुद 0किमी हि पाटी पहिली आणि काहीतरी आठवायचा प्रयत्न करत होतो पण काही आठवत नव्हते आणि थोड्या वेळाने आठवले कि "केशवराज मंदिर" मिलिंद गुणाजी यांच्या 'गूढ-रम्य महाराष्ट्र' या पुस्तकात या ठिकाणचे खूप रमणीय वर्णन वाचण्यात आले होते आणि ते ठिकाण आता अनपेक्षितपणे माझ्या जवळ आले होते म्हणून मला अत्यंत आनंद झाला होता आसुद गावापासून 1किमी आत गेले की दाबकेवाडी पासून मंदिरात जाता येतं

                    पुस्तकात वाचले होते की 200 सरळ पायऱ्या , करवंदाच्या जाळ्या  , नारळी पोफळीच्या बागा यातून मार्ग आहे आणि तो एक सुंदर अनुभव आहे मी चौकशी करून घेतली व त्यामुळे मला माहित झालं होतं कि मला त्या मंदिरातून पायी जाऊन येण्यासाठी किमान एक तास लागणार होता पण मला मात्र वेळ वाया घालवून चालणार नव्हतं दहा सव्वा दहा वाजले होते अन मला 80 किमी महाड अन तेथून 28 किमी रायगड असा प्रवास करायचा होता आजचा मुक्काम रायगडी करायचा होता अन जेवणालाही वेळ जाणार होता पण मी ठरवले की जेवायचं काय जेवता येईल केंव्हाही?  निसर्गाची ओढ असल्याने मी मंदिराकडे निघालो होतो आणि त्या वेळी दाबकेवाडीत मी मंदिराकडे जाण्याचा रस्ता विचारला तेंव्हा गावातील लोकांनी सांगितले की पायऱ्यांचा मार्ग पुढे असून फक्त छोटया  दुचाकी गाड्यासाठी एक रस्ता तयार केला असून तो मारुती मंदिरापासून जातो एक दीड किमी अंतर गाडीवर जाण्यासाठी 15- 20 मिनिटे लागतात अतिशय अवघड आहे तो रस्ता  पुस्तकात वाचल्याप्रमाणे केशवराज मंदिरात जाण्यासाठी नदीचे पात्र ओलांडून पायऱ्या चढून वर जावे लागते ते खरेही होते कारण पुस्तक लिहिले त्यावेळी पूल नव्हताच  पण सध्या मात्र नदीवर पूल बांधला असून मोटारसायकलीसाठी कच्चा रस्ता तयार करण्यात आला आहे लहान वाहनांसाठी ,मी गाडीवर जायचे ठरवले आणि मारुती मंदिरापासून आत वळलो आणि पोटात गोळा आला अतितीव्र उतार होता व वळणही होते आणि तेथून गाडी घेऊन जाण्याचे धाडस झाले नाही कारण रस्त्याचा पुढचा भाग इथून दिसतच नव्हता म्हणून भीतीपोटी मी गाडी थांबवली अन शेजारच्या घरी जाऊन रस्त्याची चौकशी केली कि केशवराज मंदिराकडे जाणारा मार्ग हाच आहे का? खात्री पटल्यावर मी स्वतः त्या उतारावर जाऊन खात्री केली की जाता येईल का? परंतु त्या रस्त्याने जाता येईल की नाही अशी शंका मनात आली पण मनाचा हिय्या केला आणि पहिल्या गियरमध्ये गाडी चालू करून उतार उतरू लागलो लगेच एक अवघड वळणही आले ते पार करून पुढे आलो आणि मग त्यापुढे नदीवरील छोटा पूल ओलांडला कि  फक्त अतितीव्र चढण असलेला घाट होता तोही अगदी कच्चा फक्त डोंगराच्या कुशीतून जाणारा  अन त्या रस्त्याने मी एकटाच जात होतो गर्द वनराई खूप छान वाटत होती उंचच उंच माडाची सुपारीची झाडं तसेच इतर अनोळखी झाडं खूप उंच सूर्याची किरणे जमिनीपर्यंत पोहोचत नव्हतीच दाट झाडीतून जाणारा मार्ग तोही अगदी निमुळता निसर्गसौंदर्य ओतप्रोत भरलेले होतं  पण मला गाडी चालवत असताना लक्ष विचलित होऊ नये म्हणून मी काळजी घेत होतो कच्चा रस्ता फक्त मोटारसायकल जाण्यापूरता आहे कसरत करत त्या रस्त्याने मंदिराच्या परिसरात पोहोचलो गाडी पार्क करून मी थोड्या पायऱ्या चढून गेल्यावर समोरच एक मोठा आवार दिसला आणि सभोवार आकाशाला गवसणी घालणारी नारळी पोफळीची झाडे त्यामुळे खाली सावलीच होती

            मंदिर परिसर स्वच्छ आणि शांत व रमणीय आहे थकवा जाणवत नाही थोडाही मंदिराच्या परिसरात मंदिराच्या आवारात बसायला जागा आहे निसर्ग सौंदर्य आणि स्वच्छतेने नटलेला परिसर खूप आल्हाददायक आहे मोठ्या गेटमधून आत गेल्यावर उजव्याबाजूला आतमध्ये खूप उंचावरून येणारे पाणी गोमुखातून आत येते त्याचा उपयोग मंदिरात प्रवेश करण्याअगोदर हातपाय धुण्यासाठी केला जातो एवढ्या उंचीवर असूनही एवढ्या मोठ्या प्रमाणावर गोमुखातून पाणी येताना पहिले कि निसर्गाच्या अद्भुत चमत्काराची जाणीव होते त्या खळाळत वाहणाऱ्या थंडगार आणि स्वच्छ पाण्यात हात पाय धुवून मी मंदिरात प्रवेश केला. मंदिर अतिशय साधे आहे मंदिराचे बांधकाम लाकडी असून पत्र्याचे व लाकडाचे छत आहे मंदिराच्या गाभाऱ्यात सोवळे नेसूनच प्रवेश केला जातो सोवळे नसल्यास गाभाऱ्यात प्रवेश दिला जात नाही आणि मला सोवळे नेसता येत नाही आता काय करायचे मग पुजाऱ्याने एक मार्ग सांगितला मी कमरेच्या वरची सर्व कपडे काढून गाभाऱ्यात प्रवेश केला व दर्शन घेतले केशवराज  हा भगवान विष्णूचा अवतार असल्याने हातात गदा शंख पुष्प  आदी आयुधे असलेली मूर्ती खूपच सुंदर आहे गाभाऱ्यातून बाहेर येऊन पुजाऱ्याशी गप्पा मारायला सुरुवात केली मला करवंदाची जाळी ओळखता येत नव्हती त्याबद्दल पुजार्यांना विचारले असता त्यांनी सांगितले करवंदे आता नसतात मग मी मिलिंद गुणाजी या अभिनेत्याचा संदर्भ दिला असता पुजारी म्हणाले की मिलिंद गुणाजी 7-8 वर्षांपूर्वी आले होते व शुटींग काढून गेले त्याच बरोबर असे सांगितले कि हे मंदिर दीक्षित,पाठक, असे आडनाव असलेल्या  ब्राह्मनांचे कुलदैवत आहे गाडीच्या कच्च्या गाडीच्या रस्त्याची माहिती त्यांनी लिहिलेल्या पुस्तकात नाही असे सांगितल्यावर गाडीचा रस्ता आता तयार केला असल्याने त्यांच्या पुस्तकात माहिती नसावी असे सांगितले  व तो अवघड असल्याने आम्ही नवीन माणसाला या मार्गाची माहिती सांगत नाही असे म्हटले 

             परंतु पायऱ्या चढून वर येण्याची मजा काही औरच असते पायऱ्या  चढून येताना वाटेत अनेक ठिकाणी करवंदाच्या जाळ्या लागतात त्या जाळीतून करवंद काढून खाण्याची मजा काही औरच असते असे मी ऐकले होते मात्र मला अनुभवता आले नाही कारण त्यावेळी करवंद तसेच इतर कोकणी मेव्याचा हंगाम नव्हता गोमुखातून येणाऱ्या पाण्याने तोंड धुऊन पाणी पिलो अगदी मिनरल वॉटर सारखे होते त्यामुळे सोबतची बाटली भरली एक सांगायचे झाल्यास कोकणात प्रवास करताना बऱ्याचदा पाण्याची बाटली विकत घेण्याची आवश्यकता भासत नाही मी पुजाऱ्यांचा निरोप घेतला अन परत निघालो होतो पण पाय निघत नव्हता परिसर अत्यंत रमणीय आहे पण वेळ कमी असल्याने मी परत एकदा नमस्कार करून परत निघालो अनेक सुपारीच्या झाडाला सुपाऱ्या लागलेल्या होत्या हिरव्या रंगांच्या, गाडीवर आल्याने बराच वेळ वाचला होता मात्र पायी चालत पायऱ्या चढून वर येण्याचा अनुभव घेण्यास मी मुकलो होतो आता रस्ता माहित झाल्याने थोडे रिलॅक्स होऊन गाडी चालवत होतो पण सभोवताली  असणारा निसर्ग पाहण्याचीही उसंत नव्हती सगळे लक्ष अगदी समोर एक क्षणभरही लक्ष विचलित होत नव्हते 10-12मिनिटात गावात आलो या रस्त्याने डबलशिट गाडी चालवणे खूप कठीण आहे मला तर वाटते अशक्यच आहे सर्वांना परत एकदा सांगावेसे वाटते की हा रस्ता फक्त दुचाकी वाहनासाठीच आहे तीन-चार चाकी वाहन खालीच लावून पायऱ्याने वर येणेच योग्य आहे मी मात्र  परत एकदा मागे वळून पाहिलं आणि ठरवलं की परत यायचेच या ठिकाणी कारण हा परिसर काय तास अर्धा तास घालवण्याचा आहे?  नाहीच, दिवस अर्धा दिवस एक एका ठिकाणी घालवणे खूप आनंददायी असेल गर्द झाडीत असणारे नारळ अन पोफळीच्या उंचच उंच झाडांच्या गर्दीत असणारे हे  केशवराज मंदिर मला खूप आवडले होते आता परत निघालो होतो मी दापोली-पालगड-लाटवण-महाड या मार्गाने अकरा वाजले असतील

क्रमश:

शब्दांकन

शंकर शिंदे

संपर्क:- 9423039683

                          मागील सर्व भागांच्या  पोस्ट वाचण्यासाठी माझ्या ब्लॉगला भेट द्या यासाठी खालील लिंकवर क्लिक करा

http://shankarshinde01.blogspot.in

आणि

माझ्या सहलीचे  सर्व फोटो पाहण्यासाठी  खालील लिंकवर क्लिक करा

https://goo.gl/jyqck3

सुंदर दिवसाच्या सुंदर शुभेच्छा!!

या लेखमालेच्या संबंधित काही मार्गदर्शन , सूचना करायच्या असतील तर सदैव आपले स्वागतच आहे

©® कॉपी&पेस्ट करायचे असल्यास वरील लेखात व मजकुरात बदल करू नये